صور لمجموعة ستائر ونصايح هتساعدك وانت بتختار شقتك اشكال

صور لمجموعة ستائر هتساعدك وانت بتختار شقتك اشكال واحجام مختلفة من الوسيط العقارية بشبين الكوم
نصائح مهمة في اختيار الستائر المناسبة لبيتك من الوسيط العقارية بشبين الكوم
_طبعا زي ما كلنا عارفين، في ستات كتير لما تيجي تفرش شقتها وبالذات في اول الجواز بتبقى محتارة تختار الستائر الأول ولا العفش. القرار بيكون محير أحيانا بالنسبالك لأنك ممكن تختاري ستارة وتكون عجباكي جدا وبعد كدة متلاقيش العفش المناسب ليها أو العكس، فالموضوع بيحتاج تفكير كتير ووقت ومجهود ومحتاج كمان يكون خيالك واسع شوية أو عندك حس فني عشان تعرفي تتخيلي الشكل النهائي لشقتك وتكون دايما مناسبة وبشكل مميز.
. _ولأننا عارفين ان ستات كتير بتقع في الحيرة دي وكتير منهم بيضطروا يلجئوا لمهندسين ديكور عشان يساعدوهم في الاختيار وبالتالي بيصرفوا فلوس كتير ممكن يستفيدوا بيها في حاجات تانية، فاحنا هنوفر عليكي المجهود دة وهنجاوب على سؤالك وهنقولك كمان على شوية نصايح تساعدك في اختيار الستائر الصح لبيتك.
بالرغم من أن الستائر تعتبر قطعة ديكور مستقلة، الا أن اختيارها بيعتمد على العفش ودة لأن ألوان الستائر لازم تكون متوافقة مع ألوان العفش ولون الأرضية عشان يطلع بيتك شكله حلو ومرتب. ولأن الستائر تعتبر من اللمسات الأخيرة اللي بتضفي جمال لبيتك، فاحنا بننصحك باختيار العفش والتصميم الرئيسي للبيت أولا.
بعد كدة لازم تفكري في الاتي :-
نوع الستائر: بعد ما تختاري العفش والديكور، أول حاجة لازم تعمليها هي انك تختاري نوع الستارة المناسبة لديكور بيتك وبتكون يا اما “مودرن” أو “كلاسيك”. نوع القماش: -
– ودي تاني أهم خطوة بعد ما تحددي الاستايل اللي انتي عايزاه. أنواع القماش بتتنوع بين الأقمشة الفخمة زي القطيفة والمخمل، ودي بتكون مناسبة للصالة لأنها بتكون الوجهة الأولى لاستقبال الضيوف. وفي الأقمشة الأنيقة زي الشانيل، ودي تنفع لغرف النوم، والأقمشة البسيطة زي القطنية ودي بتكون مناسبة أكتر لشبابيك المطبخ ولغرف نوم الأطفال ودة لأن غسيلها بيكون سهل.
-مهم أوي انك تختاري قماش كويس بشكل عام، يعني بيتحمل درجات الحرارة العالية ولونه يفضل ثابت مع الغسيل وسهل الفك والتركيب.
نوع القماش المناسب للديكور:
– لو ديكور بيتك كلاسيكي، يبقى الحرير والمخمل والكتان والقطيفة هتكون أكتر أنواع قماش مناسبة ليكي.
– لو ديكور بيتك مودرن، يبقى القطن هيكون أحسن اختيار ليكي، وممكن تستخدمي الكتان برضه.
لون قماش الستائر: وزي ما قلنا قبل كدة، لون القماش لازم يكون مناسب للون الديكور والأرضية ولون الحوائط وبتتنوع ما بين الألوان الزاهية والألوان الكلاسيكية.
– قبل ما تختاري لون الستائر لكل اوضة، لازم تفكري الأول في الإضاءة. لو اوضتك منورة دايما بنور الشمس، يبقى لازم تختاري الستائر البيضاء أو الوردي أو البني.
– لو اوضتك مش بيوصلها ضوء كفاية، ممكن ساعتها تختاري درجات غامقة زي الرمادي والبني والأخضر والأزرق.
– اختاري الألوان الدافئة زي الأحمر والأصفر والأزرق والبرتقالي لو عايزة حجم الشباك يبان أكبر.
– لو كان السجاد منقوش ومليان رسومات، اختاري ألوان سادة للستائر.
– يفضل استخدام الستائر المنقوشة في الريسيبشن والمنقوشة برسومات واضحة عشان تجذب الانتباه، دة غير انها بتضفي حياة وبهجة في البيت.
– لو بتحبي الستائر السادة في الصالة، يبقى استخدمي الستائر الترابية لأنها موضة السنة دي.
نصائح عامة :-
– اختاري الستائر الثقيلة لغرف النوم والمعيشة لأنها بتحتاج لخصوصية أكبر.
– غرف النوم بيناسبها نوع الستائر ” البلاك أوت” ودي بتكون مناسبة للناس اللي عندها حساسية من الضوء.